Lalaki, patay matapos tinaga sa bayan ng Midsayap

Isang lalaki ang pinagtataga sa bayan ng Midsayap kagabi.

Sa ulat na pinalabas ng Midsayap Police, ganap na alas 6:30 kagabi ay isang tawag ang kanilang natanggap mula sa kapatid ng biktima ukol sa naganap na krimen.

Sa pagtungo ng mga elemento ng pulisya sa lugar ay dinala na ng mga residente sa ospital ang biktimang nakilalang si Lester Glenn Barret Cadungog, 37 taong gulang, walang asawa, walang trabaho at residente ng Purok 7, Barangay Anonang, Midsayap, Cotabato.

Samantala, nakilala ang suspek na isang Ramil Delos Santos Dapilaga, 45 taong gulang, walang asawa, isang magsasaka, at residente din ng nasabing lugar.

Sa isinagawang imbestigasyon ng kapulisan, naglalakad na umano pauwi ang biktima kasama ang kanyang kaibigang nakilalang si Arvin Rebalde Daquiado ng bigla na lamang umanong sumulpot sa kanilang harapan ang suspek na may dalang bolo at kinumpronta si Cadungog na humantong sa mainitang pagtatalo.

Nagpambuno umano ang suspek at ang biktima na nauwi sa pananaga ng suspek sa biktima na tinamaan sa kaliwang braso nito.

Mabilis na isinugod ng mga residente sa lugar ang biktima dahil sa mga seryosong na tinamo nito.

Sumuko naman ang suspek kay Anonang Punong Barangay Susana Longhay dahilan upang mahuli ito at kasalukuyang nakapiit na sa custodial facility ng Midsayap PNP at nahaharap sa kasong serious physical injury.